He oriori mo Wharau-rangi
Na Rangi-takoru
A lullaby for Wharau-rangi by
Rangi-takoru.  Performed by
Toroa Pohatu.

Taku potiki, e, ko Wharaurangi!
Ka rongo o tipuna, ka maka mai ki au,
Maku, e hine, ma te huri e,
Ma te whakarongo ki te whita-korero,
Ko te whare tena i taia ai te Kahui-rongo,
I pipiri ki te po
Nga toka whakaahu o to korua kuku e,
O toku wawa’i, o taku rua pake,.
Ka wehea ko te tau e

Hoki mai, e hine, ki te ao, marama!
Whakatu taua ki aku manu e,
Te tangata i patua e te tini o Tio,
Waiho nei ki a taua, e-e.

E hine aku, e tangi nei ki te kai.
Me whakainu koe ki te wai e ngata.,
Me whakangongo koe ki te wai ka rari;
Te mate o Tawhaki,
Whakaputa ki te toru, ka ke te kahu,
Na Tiurangi, na Tiu-pakihi,
Na Kapokai, e.

Kimikimi noa ana ahau, e hine,
I to kunenga mai i Hawa-iki,
I te whakaringaringa, i te
whakawaewae,
I te whakakanohitanga
Ka manu, e hine, te waka i a Ruatea,
Ko Kura-haupo.
Ka iri mai taua i runga i a Ao-tea,
Ko te waka i a Turi.
Ka u mai taua te ngutu Whenuakura;
Ka huaina te whare, ko Rangi-tawhi;
Ka tiria mai te kumara;
Ka ruia mai te karaka ki te tai ao nei.
Keria iho ko te punga tamawahine,
Ka riro i nga tuahine, i a Nonoko-
uri, i a nonoko-tea.
Ko te here i runga ko te korohunga.
Kapua mai nei e Hau ko te one ki
tona ringa.
Ko te Tokotoko-o-Turoa
Ka whiti i te awa,
Ka nui ia, ko Whanga-nui;
Ka tiehutia te wai, ko Whanga-ehu;
Ka hinga te rakau, ko Turakina;
Ka tikeitia te waewae, Ko Rangitikei;
Ka tatu, e hine, Ko Manawa-tu;
Ka rorowhio nga taringa, ko Hokio.
Waiho nei te awa iti hei ingoa mona,
ko Ohau;
Takina te tokotoko, ko Otaki;
Ka mehameha, e hine, ko Wai-meha;
Ka ngahae nga pi, ko Wai-kanae;
Ka tangi ko te mapu,
Ka tae atu ki a Wai-raka,
Matapoutia, poua ki runga, poua ki raro,
Ka rarau e hine!
Ka rarapa nga kanohi, ko Wai-rarapa,
Te rarapatanga o to tipuna, e hine!
Ka mohiki te ao, ko te Pae-a-Whaitiri;
Kumea, kia warea Kai-tangata
Ki waho ko te moana.
Hanga te paepae, poua iho;
Te pou whakamaro o te ra, ko Meremere.
Waiho te whanau, te Punga o tona waka
Ko te Hau-mea, ko te Awhe-ma;
Kaati, ka whakamutu, e hine!